Праект Пакаянне » Навіны » Палітыка » Юшчанка надаў Сцяпану Бандэру званне Героя Украіны
Юшчанка надаў Сцяпану Бандэру званне Героя Украіны
22 студзеня 2010 | Палітыка |
 Пра гэта прэзідэнт аб'явіў у пятніцу падчас урачыстасцяў, прысвечаных Дню саборнасці Украіны.Юшчанка падкрэсліў, што гэта высокае званне, паводле яго ўказу, прысвоена Бандэру за «адстойванне нацыянальнай ідэі і барацьбу за незалежную ўкраінскую дзяржаву». Узнагароду з рук прэзідэнта атрымаў унук лідэра нацыяналістаў і яго поўны цёзка Сцяпан Бандэра. Раней Юшчанка надаў званне Героя галоўнакамандуючаму Украінскай паўстанцкай арміі (УПА) Раману Шухевічу. Сцяпан Бандэра ў 1940-50-я ўзначальваў Арганізацыю ўкраінскіх нацыяналістаў (АУН), якая змагалася за ўтварэнне незалежнай дзяржавы на тэрыторыях, населеных этнічнымі ўкраінцамі. У гады Другой сусветнай вайны з-за разыходжанняў з немцамі па пытаннях украінскай незалежнай дзяржавы трапіў у нямецкую турму, а потым і ў канцлагер. Пасля вайны апынуўся на тэрыторыі Нямеччыны, адкуль спрабаваў кіраваць барацьбой супраць бальшавісцкай акупацыі. 15 кастрычніка 1959 года агент савецкага КДБ Сташынскі ў Заходняй Нямеччыне з адмысловага пісталета стрэліў у твар Бандэру растворам цыяністага калію і нанёс смяротную траўму. 20 кастрычніка лідэра ўкраінскіх нацыяналістаў пахавалі ў Мюнхене, дзе ён і быў забіты. Сташынскі ў 1961 годзе перабег з Усходняга Берліна ў Заходні, дзе звярнуўся ў амерыканскае прадстаўніцтва з прызнаннем у забойстве Бандэры. У кастрычніку 1962 года ў Нямэччыне над ім адбыўся суд, падчас якога ён прызнаўся, што дзейнічаў па загадзе савецкага кіраўніцтва. У выніку Сташынскага прысудзілі да васьмі гадоў строгага рэжыму. Кіраўніцтва КДБ адмаўляла датычнасць да забойства Бандэры, пакуль у 2005 годзе былы старшыня Камітэта Уладзімір Кручкоў не прызнаў, што «забойства Сцяпана Бандэры была адной з апошніх ліквідацый КДБ гвалтоўнымі метадамі непажаданых элементаў». Ва Украіне Бандэру ўжо даўно ўшаноўваюць як нацыянальнага героя. Львоўскі абласны савет на сесіі 7 кастрычніка 2008 года заснаваў узнагароду яго імя. Годам раней у горадзе была заснавана журналісцкая прэмія ў яго гонар і ўсталяваны помнік Бандэру. www.charter97.org, выява www.euroradio.fm |
