Пакаяньне

18 сакавіка споўнілася 79 гадоў беларускаму грамадскаму і рэлігійнаму дзеячу шматгадоваму вязьню ГУЛАГу, пастару Беларускай Евангельскай Царквы і старэйшаму сябру БХД Эрнсту Канстанцінавічу Сабілу. Сябры праекту "Пакаяньне" аргкамітэта БХД наведалі і павіншавалі яго зь днём народзінаў. 
 

"Дзякуй за віншаванні. Сведчу, што і я, і ўся наша Беларуская Евангельская Царква  заўсёды молімся за ўсіх прыналежнікаў БХД, за ўсіх беларускіх дэмакратаў і за ўсіх беларусаў, каб пазналі, што ёсьць воля Божая, і трымаліся яе", - зьвярнуўся да сябраў БХД Эрнст Сабіла.

Сабіла Эрнст Канстанцінавіч нарадзіўся 18.03.1932 ў Дзехцяроўка Менскага раёну. Сям’я Сабiлаў як ненадзейная была выселеная далей ад савецка-польскай мяжы і пасялілася ў Бабруйску. Падчас нямецкай акупацыі яны далучыліся да евангельскіх хрысціянаў-баптыстаў, былі ў партызанах. 

У 1951 годзе студэнт Менскага медыцынскага інстытута Эрнст Сабіла быў арыштаваны і паводле арт. 72-Б Крымінальнага кодэксу БССР (антысавецкая агiтацыя на падставе рэлiгiйных i нацыянальных забабонаў) быў прысуджаны да расстрэлу. Расстрэльны прысуд быў заменены на 25 гадоў лагероў. У агульнай колькасьці ён правёў у ГУЛАГу 13 гадоў. Двойчы рабiў спробы ўцячы, толькi цудам застаўся жывы. 

У 1964 быў вызвалены і з часу вызвалення знаходзіўся пад наглядам КДБ. У 1970-х г. здолеў скончыць вячэрняе аддзяленне Мінскага iнстытута замежных моў. Напачатку 1970-х г. стаў прапаведнiкам адной з незарэгiстраваных баптысцкiх супольнасцяў Менска. З 1988 прасвiтар Евангельскай царквы. Набажэнства вядзе на беларускай мове. 

З пачатку 90-х актыўна ўдзельнічаў у грамадскім жыцці, выступаў у СМІ i на мiтынгах. Увайшоў у аргкамітэт па стварэньні партыі "Беларуская хрысьціянская дэмакратыя".