Пакаяньне

У ноч з 27 на 28 лістапада актывісты Маладога Фронту перайменавалі помнік Чапаеву у помнік Станіславу Булак-Балаховічу.

Так быў адзначаны Дзень Герояў (90-годзьдзе Слуцкага Збройнага Чыну) у сталіцы Заходняй Беларусі. Замест сьцёртага надпісу "Чапаев" да помніка была прымацавана шыльда, дзе залатымі літарамі было прапісана імя генэрала Булак-Балаховіча й гады ягонага жыцьця. Як паведамляюць гарадзенцы, затрыманых, пакалечаных, параненых — няма. Ніводны патрульны таксама не пастрадаў.

"На працягу восені мы адзначалі слаўныя даты беларускай вайсковай гісторыі, — камэнтуе мясцовы актывіст, — гэта і дзень Беларускай Вайсковай Славы, і Дзяды (ладзілася паездка на радзіму Каліноўскіх), зараз ушанавалі Дзень Герояў — дату пачатку дзейнасьці Слуцкага Збройнага Чыну ў абарону БНР. Генэрал Булак-Балаховіч прымаў у гэтых падзеях непасрэдны удзел, таму дата і стала нагодай да зьяўлення такога помніку."

Будаўніцтва помніку Чапаеву ў Гародні пры камуністах адмыслова не плянавалася. Матэрыялы для помніку выдаў украінскі камбінат будаўнічых матэрыялаў у якасьці рэшты. Відаць не было грошаў, каб аплаціць наяўнымі, вось і у давесак да будаўнічых блёкаў ды арматуры камбінат выдаў сыравіну для помніка.

"Пэўна, пры хуткім будаўніцтве камунякі памыліліся, можа яны думалі, што Чапаеў ёсьць псэўданімам Булак-Булаховіча. Зьнешняе падабенства твараў пра гэта сьведчыць. У любым разе цяпер замест сьцёртых нябачных літарак можна пабачыць сапраўднае імя й прозьвішча. — апавядаюць маладафронтаўцы з Гародні. — Мы такім чынам вярнулі гістарычную справядлівасьць."

На думку удзельнікаў акцыі, перад выбарамі акурат час успомніць герояў з нашай гісторыі: Астрожскага, Каліноўскага, Балаховіча, Філістовіча — іх прыклад надае энтузіязму й веры ў лепшую будучыню Беларусі — таго, чаго нам акурат не хапае. Тым больш, тыя людзі сустракаліся тварам да твару з куды больш жахлівым ворагам і рызыкавалі непасрэдна сваім жыцьцём і жыцьцямі сваіх блізкіх.
"З Божай дапамогай мы абавязкова пераможам!" — упэўненыя гарадзенскія маладафронтаўцы.




Фотаздымкі генэрала Станіслава Булак-Булаховіча:












































Малады фронт